My health is my life <3
أحاول استوعب فكره اني لما الآن على قيد الحياة
اليوم جا على بالي اكتب الأحداث اللي صارت لي هالفترة .. وفتحت اللاب وعالتمبلر على طول وماني عارفه كيف راح ابدأ ..
اوكي .. راح ابدأ قبل شهرين تقريبا
بهذيك الفتره كنت امر بظروف صعبه شوي من ضغط الجامعه وضغط العمل وووو حاجات كثيره مالها اول ولا اخر
وكنت بكل مره احس نفسي متضايقه تجيني آلام فضيعه بمعدتي وماكنت عارفه ليه قلت لماما وقالت لي أكيد رجع القولون المهم مرت الايام وكانت ترجع لي بين فتره وفتره .. قبل فتره توفت عمتي وبعدها صاحبتي والغريب انو من بعد مابديت اقرب منهم وعلاقتي معاهم صارت اكبر هنا حسيت اني ضعفت وكانت من جد صدمه ..
زادت علي الآلام وكنت اتوقع انو من اكل المطاعم لأنو بالفتره الاخيره كثرت منها صرت اخفف شوي شوي بس الاحظ الالم مستمر مر يومين اتلوى بفراشي واحاول بأي طريقه اخفف من الالم مره احط المخده على بطني ومره انام على بطني ومره الف نفسي كأني بيبي مااافي فايده
رحت بيت جدي واقول لجدتي الاعراض قالت لي معاك قولون واعطتني من علاجاتها اثنين واحد للمعده وواحد للقولون وكان مفعولهم كويس بس لازم بعدهم اكل وانا شهيتي مره قافله احس اي حاجه راح اكلها بارجعها واتو بكرامه :(
واحنا بالسياره راجعين للبيت رجع لي الالم قووووي ومو عارفه ايش اسوي اخذت اسكوبينال حبتين وماكان في مويه :/
ماما تقولي تبغين حليب تشاكلت < حق اخوي الصغير
هي بس قالت الاسم قلبت كببببدي وودي اقولها لاااا تكفين اوووش
وبلعتهم من غير مويه
وصلت البيت طحت ونمت ومادري متى صحيت اخر شي بس كل نص ساعه اصحى للباثروم :/
من بكره صحيت وصليت وانا منهد حيلي وانسدحت بفراشي لما المغرب بعدها صليت وجت اختي تقولي قومي البسي علشان تروحين المستشفى كان ودي اصرخ بوجهها واقول لااا ! ماابغى !
لأني طول هالفتره ما يجي فبالي الا عمتي الله يرحمها لما دخلت المستشفى علشان حاجه بسيطه وبكل مره يطلعون فيها الف مرض ومرض لما توفت حسيت انهم بيطلعون فيني امراض الدنيا وخفت والله
بس مجبوره اروح .. واقوم ابدل ملابسي وخانقتني العبره وخاااايفه
والله اني اطالع فالبيت وارتب الغرفه قبل اطلع وجالسه عالكرسي بالمدخل واطالع كل مكان وعيوني تحرررقني بديت اوسوس اني ماراح ارجع !
رحت ودخلت عالدكتور وفحصني وانا عيني على بابا :( كميه وسوسه وخوف مو طبيعيه
بعد كذا نزلوني للمختبر سويت تحليل كامل للدم وفحص جرثومه المعده واخر شي سويت اشعه موجات صوتيه طلعت النتائج ودخلت عالدكتور وانتظر الصدمه
بس بعد ماسمعت اللي فيني ودي ابكي من الفرح كنت متوقعه اكبر من كذا
قالي التهاب شديد في القولون
وتقرحات في المعده
ومادري ايش بالأثنى عشر
ورمل بالحالبين
الحمدلله يارب .. بس ليه كل هالالم كل العالم فيهم قولون وما اشوفهم يتلوون زيي
ولما شرحت له الوضع كتب لي ابرتين وحده مسكنه والثانيه تفتح الشهيه
رجعت البيت وقدرت اكل بعد العلاج الحمدلله بس اول ما حطيت راسي بنام ومبسوطه ابغى انام قبل يروح تأثير المسكن
ويجيني الم ووجع فضيييع رجعت اتلوى وامسك بطني ولاشعوري كنت اقرا وادعي نفس اللي كانت تقولهم عمتي الله يرحمها بيوم وفاتها بديت اخاااف اكثر بس استمريت
ونمت بعد معاناه .. هذا اللي يقولون شفت الموت بعيوني
صحيت اكثر من مره طبعا للباثروم :/ وعلشان العلاجات والصلاه
الالم اللي كان بمعدتي ونزل لبطني وصار مغص بدا يخف الحمدلله بس اول ما اكل يرجع قبل اكمل اللقمه :/
وانا ما اكل الا علشان العلاجات يعني غصب عني
يالله .. ايام صعبه من جد
كنت بصحه وعافيه وكنت بنعمه عظيمه وماحسيت فيها الا لما فقدتها
حاسه اني كذا بعد يومين راح اخف ان شاءالله على كلام الدكتور بس حابه اقولكم انتو بنعمه عظييييمه احمدو ربكم واشكروه عليها
قادرين تاكلون كل اللي تشتهون قادرين تتحركون بدون اي تعب قادرين تصلون بدون ماتتهيدون
قادرين تنامون ساعات متواصله
قادرين تبتسمون
لما تصحو كل يوم من النوم حطو ايديكم على قلوبكم
تحسسو النبض ..
مادامت قلوبكم حيه قولو الحمدلله انو ربي امد في عمركم علشان تعملو للآخره
علشان تلاقو حاجه تقدموها وتشفع لكم يوم القيامه
ابتسسسسمو
الحياه حلوة مهما واجهنا من صعوبات
مهما بكينا وتألمنا
مهما فقدنا ناس غاليين
مادامتو احياء ترزقون من الله فأنتو بنعمه عظيمه
الان وانا جالسه اكتب المخده على بطني ومازال الالم مستمر وتقريبا اربع مرات قمت من مكاني
على يميني قارورتين مويه صحه وكيس علاجاتي اميل راسي و اطالع ملامحي بطرف شاشه اللاب وابتسم
الحمدلله على كل حال
من فتحت التمبلر وانا ماغير اجمع بالصور :$ .. حبيت يكون لي بصمة هادفه قبل اتركه .. دعواتكم لي
مع السلامة =)
